أنا كنت في سيدي جابر

أنا كنت في سيدي جابر

و شفت بأمِّين عيني الخناجر

بترشق في ضهرك

يا ثورة حناجر

و غازك يا ماما أمريكا

على عينك يا تاجر

و طوب عم يطير

و مولوتوف كتير

وأيضاً ضرب نار..

مين فيهم الأشرار؟

إن كان المسلحين

اللي بيضربوا في المصريين

-و نازلين "تكبير"-

إن كانوا إسلاميين

فأبو أم ده دين..

-أكيد متوقِعين!-

إخوان دولت

ولا أمن

ولا حتى حبسجية

مش فارقة معاي!

 

المشهد عماني

و زلزل كياني

و سافر في ذهني

كلام الأغاني:

"أنا رحت القلعة و شفت ياسين

حواليه العسكر و الزنازين"

         06-07-013         09:00

بيان رقم تيت

تيت 

كان يا ما كان

يا أوان يا زمان

كنت أنا واحد إنسان

كان لي مكان

و أهل كمان

و في بعض الأحيان

كنت ببقى مش قلقان

بس الآن:

طار النوم من عيني

مش باستحمل ديني

ثابت بس يقيني

إن ثباتي أمان

 

كل دهوة هان

أما اتضح و بان

إن العصر ازدان

بحكم الإحم

 

        06-07-013          09:11

حتة قشطة

رايح بكرة أحدّف قشطة

يمكن ترشق منها قذيفة

في زور الناس البِلْطة

تصحى الناس على حجم الغلطة

يمسك شعبي حقيقي السلطة

مش يتعيّن حاكم قصر

يدعي شيوخهم ليه بالنصر

ينشر بيننا الجوع و القهر

و الجواسيس و الناس الكسْر

بكرة أكيد النصر لشعبي

بكرة أكيد النصر لمصر

        29-06-013        03:26

تسمح؟!

تسمح انت تقوللي لماذا كل ما أنادي عليك تقلبني

مرة بتعمل نفسك هايم و أنده ياما و لا تعبرني

مرة كمان قال إيه مش سامع اوعى تظن ان انت خادعني

لولا ان انت جمالك آية كلك كده على بعضه عاجبني

كنت زماني رميت الطوبة آه من سحره اللي مدوبني

حالف إني ما أسيبك خالص حتى لو انت يا روحي تسيبني

هافضل كده أحاول وياك و انت أكيد راح يوم توافقني

تقريباً 17-05-006